di V. D’Angelo
Di l’omu chi t’alliscia statti attentu,
l’omu chint’accarizza com’un santu
è l’omu chi ti metti a lu turmentu;
l’omu ca ti pripara peni e chianti
cu grazia ti fa ogni muvimentu,
ti parla piatusu, quasi a stentu
cà cerca di spizzari lu to ‘ncantu.
L’omu chi t’alliscia e t’accarizza
Finci ca t’ama beni e ti disprezza.
Ti cudìa gammi gammi comu un cani,
ti licca comu licca lu patruni,
ti fa lu ‘nchinu, ti vasa li mani
e tituli ti duna di baruni,
ti jinchi di paroli beddi e sani
ma jittariti vulissi ‘nt’un fussuni.
Li paruleddi so su’ viziusi:
sfruttari voli e carricari pisi!
