numaru setti, accrocca cristiani;
lu nomu chi ti dettiru zappuni
fu assiddiutu ‘nta li nomi strani;
accurza nerbi di lu to patroni,
distrudi vrazza, spaddi, rini e mani;
fa caminari a test’appuzzuni,
a quattru pedi, peggio di li cani.
T’avìanu a chiamari ammagenti,
vili assassinu, capu di briganti;
bruttu si’ furmatu e malamenti
cà cu ti sfida resta scuncirtanti;
tu fa li stragi e duni suffrimenti,
metti li dulura strazianti,
lu to patroni lu lassi scuntenti
cci levi la so gioia di davanti.
Doppu ‘na jurnata di zappari
Lassi stanchizzi, strapazzu e duluri;
a cu ti manìa lu fai lamintari,
lu lassi giarnuliddu di coluri;
nni lu so lettu nun po’ ripusari,
poviru cuntadinu zappaturi,
mani ‘ncadduti cu dulura amari,
si senti ‘n cruci comu lu Signori!
Lu cuntadinu a tia malidici
Cà cci levi lu riposu e la so paci;
s’’un fussi pi lu pani tantu duci,
ti squagliassi ‘nti ‘na fornaci;
ma semmu custritti ad essiri to amici,
‘n mezzu li lamenti, lu chianti e li vuci.
Si ti vo scarricari li ‘nnimici,
zappa suliddu, ‘un essiri scapaci!
