OGN’UNU PORTA UN DONU
“Ogn’unu porta un donu a lu Messia;
a lu Bamminu scarsu e puvureddru.
– Davanti a lu presepiu cci dicia
la nanna a so’ niputi nicareddru –
Lu picuraru porta ‘n’ agniddruzzu
lu mulinaru porta la farina
lu furnareddru cci porta un panuzzu
lu viddraneddru furmentu e racina.
Ogn’unu porta un donu e ssu’ cuntenti
pirchì “nni chista vita, niputeddru,
nun c’è cchiù bellu, e tenitillu a menti,
di fari un piaciri a un puvureddru.
A.D’Ascoli
LU ME’ NATALI
La notti di Natali, tutti l’anni,
d’incantu mi ritrovu nicareddru
cu ‘na spiranza sempiri cchiù granni
ca nasci lu Divinu Bammineddru.
M’arriva di luntanu, duci duci,
a lu chiaruri di ‘na cannileddra,
di notti sutta un celu chi spirluci:
lu sonu anticu di ‘na ciarameddra.
E poi cuntenti; l’angili vulannu,
mentri li Magi sunnu pi la via,
di porta a porta dicinu cantannu:
” Nascì lu Bammineddru!; lu Messia!”
A.D’Ascoli
